रसुवाको सयौँ किसान टनेलमा गोलभेंडा खेतीतर्फ आकर्षित भएका छन् । प्लास्टिक टनेलको सहायताले तरकारी खेती गर्दा आम्दानी र रोगकिराबाट समेत बचाउन सकिने भएकाले यहाँका किसान टनेलमा गोलभेंडा तथा तरकारी खेतिमा क्रियाशील भएका हुन् ।

तरकारी खेतिको मौसमी, वेमौसमी तथा विभिन्न तालिम पाएपछि साग, सब्जीसमेतको उत्पादन गर्न किसानहरु अग्रसर भएको र वर्षा मौसममा गोलभेंडा प्रति किसानहरुले किलोग्राम ८० रुपैया रुपैयाँसम्ममा बिक्री हुने गरेको जिल्ला कृषि विकास कार्यालय रसुवाले जनाएको छ । पहिले बाबुबाजेको पालामा नुवाकोटको त्रिशूली बजारबाट खानका लागि गोलभेंडा ल्याउनुपथ्र्याे, अहिले गाउंमै फल्दा खुसी लागेको धैवुङका किसान भीम पौडेलले बताए ।

किसानहरुलाई नयाँ कृषि प्रणालीअन्तर्गत जिल्ला कृषि विकास कार्यालयले प्लास्टिक, बिउ तथा प्राविधिक ज्ञान उपलब्ध गराउन थालेपछि गोलभेंडा खेतीमा किसान आकर्षित भएको र जिल्लामा उत्पादित गोलभेंडा स्थानीय बजार तथा नुवाकोट जिल्लामा समेत निर्यात हुने गरेको नागरिक समाज रसुवाका अध्यक्ष बाबुलाल तामाङले बताए ।

जिल्ला कृषि विकास कार्यालयका प्रमुख रमेश हुमागाईले जिल्लाभित्र हालसम्म आठ सयवटा प्लास्टिक टनेल जडान भइसकेको वताए ।
टनेलभित्र रोपिएका गोलभेंडाबाट यस वर्ष किसानले दुई करोड ५० लाख आयआर्जन गर्ने उनको भनाई छ । टनेलबाट गोलभेंडा उत्पादन गर्न किसान क्रमशः अग्रसर भइसकेको अनुुदान सहयोगमा प्लास्टिकको मागसमेत बढ्दै गएको हुमागाईले बताए ।