१६ पुस, विदुर । गृह मन्त्रालयद्वारा सार्वजनिक गरिएको आर्थिक वर्ष २०८२/८३ को पहिलो त्रैमासिकको कार्य सम्पादन प्रगति विवरण नतिजा अनुसार नुवाकोट जिल्ला ‘ख’ वर्गका जिल्लाहरूको सूचीमा छैठौँ स्थानमा रहेको छ।

विवरणअनुसार ‘ख’ वर्गका जिल्लाहरूमा नुवाकोटसँगै जाजरकोट र बैतडीले पनि समान २७.५ अंक प्राप्त गर्दै छैठौँ स्थान नै हासिल गरेका छन्।

जिल्ला प्रशासनले आफ्नो प्रशासनिक जिम्मेवारी र सेवा प्रवाहमा कत्तिको चुस्तता देखाएको छ भन्ने मापन गर्दछ। नुवाकोटको ५५ वटा कार्य स्वीकृत हुनु र ५ वटा अस्वीकृत हुनुले यसको कार्य सम्पादनको गुणस्तर र सुधारका क्षेत्रहरूलाई स्पष्ट पार्दछ।

यसैगरी ‘क’ वर्गका जिल्लाहरूमध्ये ललितपुर जिल्लाले सबैभन्दा बढी प्राप्ताङ्क प्राप्त गरेको छ । दाङ (२७.९३७५ अंक) दोस्रो स्थानमा र सप्तरी (२७.५६२५ अंक) तेस्रो स्थानमा रहेका छन् । यस वर्गको सबैभन्दा तल्लो स्थानमा भने पर्सा जिल्ला (६.३१२५ अंक) रहेको देखिन्छ ।

‘ग’ वर्गका जिल्लाहरूमध्ये मनाङ जिल्लाले सबैभन्दा बढी प्राप्ताङ्क ल्याएको छ। मनाङपछि रसुवा जिल्ला २८.६८७५ अंकका साथ दोस्रो स्थानमा र तेह्रथुम जिल्ला २७.८७५ अंकका साथ तेस्रो स्थानमा रहेका छन् ।