विदुर – सरकारले विश्वव्यापी महामारी कोरोना (कोभिड-१९) भाइरस संक्रमण नियन्त्रणका लागि जेठ ५ गतेसम्म लकडाउन गर्ने निर्णय गरेको छ। बुधबार बिहान प्रधानमन्त्रीको सरकारी निवास बालुवाटारमा बसेको मन्त्रिपरिषद् बैठकले लकडाउनको समय थप गर्दै जेठ ५ गतेसम्म लम्ब्याएको छ ।
आज नै जिल्ला प्रशासन कार्यालय नुवाकोटले सूचना जारी गर्दै विद्युतीय सवारी सञ्चालन अनुमति पत्र (ई–पास) सेवाको हकमा केहि अत्यावश्यक कार्यको लागि सहज गराएको छ ।
सहायक जिल्ला अधिकारी बद्रीनाथ गैह्रेका अनुसार मृत्यु संस्कार, एकाघरको विवाह, चिकित्सकको सिफारीस सहितको अत्यावश्यक उपचार तथा सरकारी निकायको हकमा भने एक जिल्लाबाट अर्को जिल्लाका लागि ई-सवारी पासमा सहज गरिएको जानकारी दिए । अन्य प्रयोजनको लागि अनावश्यक रुपमा ई-पासको आवदेन नभर्न निर्देशन दिईएको छ । यसअघि ई-पासको दुरुपयोग भएको भन्दै पास व्यवस्थालाई पूर्ण रुपमा रोक लगाएको थियो ।
लकडाउन अवधिमा अनुमतिप्राप्त सवारी साधन, स्वास्थ्यकर्मी, सुरक्षाकर्मीलगायत अत्यावश्यकबाहेक अन्य सेवा बन्द नै रहने जनाएको छ ।
प्रतिक्रिया