लकडाउनमा ५० विपन्न वर्गका परिवारलाई खाद्यान्न सहयोग

विदुर – लकडाउनको कारण दैनिक समस्यामा परेका ५० विपन्न वर्गका परिवारलाई खाद्यान्न सहयोग गरिएको छ । नुवाकोटको तारकेश्वर गाउँपालिका ६ नेवारगाउँका दैनिक ज्याला मजदुरी गरेर खानुपर्ने ती घरपरिवारलाई शुक्रबार प्रति घर २५ केजी चामल सहयोग गरिएको हो ।

कोरोनाभाइरसको महामारी विश्वव्यापी फैलिरहेको संक्रमणकालीन अवस्थामा नेपालमा लकडाउन भएको ३२ औं दिन भएको छ । स्वास्थ्य, सुरक्षा र संचार क्षेत्रका बाहेक अन्य आमनागरिकलाई अत्यावश्यक नभई घर बाहिर ननिस्कन अनुरोध गरेको छ ।

दैनिक ज्याला मजदुरी गरेर खानुपर्ने विपन्न परिवारलाई संस्थाका स्वर्गीय गोमादेवी अर्यालको पुण्यतिथीको अवसरमा सहयोग गरिएको अध्यक्ष ईश्वर अर्यालले जानकारी दिए ।

गोमादेवी मेघनाथ अर्याल स्मृति संस्थाले उपलब्ध गराएको उक्त खाद्यान्न संस्थाका संरक्षक द्वय रामप्रसाद अर्याल र कृष्णप्रसाद अर्यालले ती परिवारलाई वितरण गरेका छन् ।

लकडाउनको समयावधि लामो हुँदै जादा दैनिक ज्यालामजदुरी गरी जिविकोपार्जन गर्ने वर्ग अहिले रोगको संक्रमण हुने त्रासले भन्दा पनि भोकको त्रासले चिन्तित बन्न थालेका छन् । लकडाउनका कारण विशेष गरी दैनिक ज्याला मजदुरी गरी जिविकोपार्जन गर्ने वर्ग थप समस्यामा परेका छन् ।