११ चैत, नुवाकोट । च्वाडी पब्लिक पूर्व विद्यार्थी समाज २०४८ ले दुई छुट्टाछुट्टै विद्यालयका विद्यार्थीहरूलाई सहयोग सामग्री वितरण गरेको छ। समाजले बेलकोटगढी नगरपालिकाका विभिन्न वडामा पुगेर विपन्न तथा जेहेन्दार विद्यार्थीहरूलाई लक्षित गर्दै शैक्षिक र विद्यालय पोसाक हस्तान्तरण गरेको हो।

एक कार्यक्रमका बीच बेलकोटगढी नगरपालिका वडा नम्बर ८ पाँचखलेस्थित जनसेवा आधारभूत विद्यालयमा अध्ययनरत २० जना विद्यार्थीहरूलाई आवश्यक स्टेसनरी सामग्रीहरू वितरण गरिएको समाजका प्रतिनिधि अनुजकुमार श्रेष्ठले जानकारी दिए । विद्यार्थीहरूलाई अध्ययनमा थप ऊर्जा र प्रोत्साहन मिलोस् भन्ने उद्देश्यले कापी, कलम लगायतका सामग्री प्रदान गरिएको समाजले जनाएको छ।

कार्यक्रममा बेलकोटगढी नगरपालिका वडा नम्बर ८ का वडा अध्यक्ष सुरेशलाल चित्रकारले पूर्व विद्यार्थीहरूको यो सक्रियताको प्रशंसा गरे । उनले आफ्नै शैक्षिक जग सुरु भएको क्षेत्रको विकास र वर्तमान विद्यार्थीहरूको भविष्यप्रति चिन्तित भएर यस्ता परोपकारी कार्य गर्नु उदाहरणीय रहेको बताए ।

समाजले बेलकोटगढी नगरपालिका वडा नम्बर १० स्थित बालकुमारी आधारभूत विद्यालयमा अध्ययनरत १६ जना विद्यार्थीहरूलाई विद्यालय पोसाक वितरण गरेको छ।