नुवाकोट महोत्सव: दुई स्रस्टा सम्मानित

विदुर – आठौँ नुवाकोट महोत्सवको अवसरमा दुई स्रस्टा सम्मानित भएका छन् । नेपाली भाषा र साहित्यक योगदानको कदर गर्दै साहित्यकार द्वय राजुमान (आरएम) डङ्गोल र टेकनाथ दाहाललाई सम्मान गरिएको साहित्य सम्मान छनौट उपसमितिका संयोजक श्रीराम श्रेष्ठले जानकारी दिए ।

साहित्यकार डङ्गोल विदुर नगरपालिका-२ शेरा र साहित्यकार दाहाल बेलकोटगढी नगरपालिका-८ जिलीङ निवासी हुन् ।

नुवाकोट उद्योग वाणिज्य संघको आयोजनामा भइरहेको महोत्सवको अवसरमा जिल्लाका दुई स्रस्टालाई सम्मान गरिएको संघका अध्यक्ष राजेन्द्र श्रेष्ठले जानकारी दिए ।

डङ्गोल वर्तमान पुस्ताका प्रखर कवि तथा समालोचक समेत हुन् । राष्ट्रिय कविता महोत्सवमा पुरस्कृत भइसकेका कवि डंगोल युवामोती पुरस्कारबाट समेत पुरस्कृत भइसकेका छन् । दुई दशकभन्दा लामो समयदेखि कविता साधानमा गर्दै आएका डंगोलका ‘राशीफल हेरिरहेको मान्छे’ र ‘दशगजावारी’ कविता संग्रह प्रकाशित भइसकेको छ ।

यस्तै, पछिल्लो समय दाहालका उपन्यास ‘विवर्तन’ चर्चित छन् । महाभारतको पात्र पृथा (कुन्ती) लाई मुख्य पात्र बनाएर लेखिएको हो । विवर्तन उपन्यासमा महाभारतमा नभनिएका सूक्ष्म घटनासमेत रोचक शैलीमा भनिएको छ ।

द्वय स्रस्टा त्रिभुवन विश्वविद्यालयका उपप्राध्यापक पनि हुन् ।