काठमाडौं – लायन्स क्लब अफ ललितपुर युनिफाइड नेसनले ललितपुरको बागमती गाउँपालिका वडा नं ३ भट्टेडाँडास्थित सातकन्या आधारभूत विद्यालयका १०४ जना विद्यार्थीलाई स्कुल जुत्ता प्रदान गरेको छ ।
लायन्स क्लब इन्टरनेसनल ३२५ जे अन्तर्गत रहेको उक्त क्लबले जुत्ता र मोजा गरी करिब ५५ हजार रुपैयाँ बराबरको जुत्ता प्रदान गरेका हुन् । विद्यालयका १ देखि ८ कक्षासम्म अध्ययनरत १०४ जना विद्यार्थीलाई आवश्यक पर्ने जुत्ता विद्यालयमा नै पुगेर प्रदान गरिएको हो ।
लायन्स क्लबले आफ्नो नियमित समाजसेवाका कार्यक्रमहरु सबै सातकन्या आधारभूत विद्यालयमा गर्दै आएको छ । यसअघि पनि क्लबले सबै विद्यार्थीलाई शैक्षिक सामाग्री तथा स्कुल पोशाक प्रदान गरिसकेको छ । छात्रावृत्ति स्वरुप १३ जना विद्यार्थीको भने सम्पूर्ण खर्च क्लबले व्यहोर्दै आएको छ ।
कार्यक्रममा बोल्दै लायन पुरुषोत्तम बस्नेतले यस अघिका कार्यक्रममा आउँदा विद्यार्थीहरुको खाली गोडा देखेर नै जुत्ता प्रदान गर्ने सोच आएको बताए । उनले जहाँ आवश्यकता त्यहाँ लायन्स हुने भएकाले विद्यार्थीहरुलाई आवश्यक पर्ने अन्य कुराहरुमा पनि सहयोग गर्ने बताए ।
त्यस्तै विद्यालयका प्रधानाध्यापक रामप्रसाद घिमिरेले विद्यार्थीहरुको हौसला बढाएर शैक्षिकस्तर सुधार गर्न सहयोग गरेकोमा लायन्स क्लबलाई धन्यवाद दिए ।
प्रतिक्रिया