२२ स्वर्ण पदकसहित लिखु प्रथम

नुवाकोट – १२औं जिल्लास्तरीय राष्ट्रपति रनिङ शिल्ड प्रतियोगितामा लिखु गाउँपालिका २२ स्वर्णपदकसहित प्रथम भएको छ ।बुधबार सम्पन्न भएको प्रतियोगितामा लिखुले १४ रजतपदक र पाँच कास्यपदक प्राप्त गरी प्रथम भएको हो ।

जिल्ला खेलकुद विकास समितिको आयोजना भएको प्रतियोगितामा विदुर नगरपालिकाले १२ स्वर्ण पदकसहित पाँच रजतपदक र १० कास्य प्राप्त गर्दै द्वितीय र सूर्यगढी गाउँपालिकाले पाँच स्वर्ण पदकसहित नौ रजत पदक र आठ कास्य पदक प्राप्त गरी तृतीय भए ।

विजेयी पालिका र उत्कृष्ट खेलाडीलाई प्रतिनिधिसभा सदस्य डा. प्रकाशशरण महतले शील्ड, मेडल र प्रमाणपत्र प्रदान गरे ।

फाल्गुण २१ देखि २४ गतेसम्म क्षेत्रपाल माध्यमिक विद्यालयको खेलमैदानमा सञ्चालन भएको प्रतियोगितामा भलिबल, तेक्वान्दो, कराते, उसु, कबर्डी र एथ्लेक्टिक्सको विभिन्न छ विधाका विभिन्न खेलमा प्रतिस्पर्धा गरिएको थियो ।

छनौट भएका खेलाडीहरुले प्रदेशस्तरीय प्रतियोगितामा सहभागी हुन पाउने समितिका अध्यक्ष सन्तोष राईले जानकारी दिए ।