रसुवा – आर्थिक अभावका कारण उच्च शिक्षाको संघारमा पुग्न नसकेका छोरी-बुहारीहरुलाई उच्च शिक्षाको पहुँचसम्म पुर्याउने उदेश्य अनुरुप कालिका गाउँपालिकाले छात्रवृत्ति कार्यक्रमको घोषणा गरेको छ ।
११३औं नारी दिवसको अवसरमा रेडियो लाङटाङले आयोजना गरेको जिल्लास्तरीय लोकदोहोरी प्रतियोगितामा गाउँपालिकाका प्रवक्ता एवं ५ नम्बरका वडाध्यक्ष सन्दिप पौडेलले उक्त घोषणा सार्वजानिक गरेका हुन् ।
बुधबार बसेको शिक्षा समितिको बैठकले करिब ३३ लाख विनियोजित बजेटबाट छोरी-बुहारी छात्रवृत्ति कार्यक्रम अन्तर्गत पालिकाका क्षेत्रभित्रका छोरी-बुहारीहरुलाई नि:शुल्क उच्च शिक्षा प्रदान गरिने निर्णय गरिएको प्रवक्ता पौडेलले बताए ।
“कालिका हिमालयन क्याम्पसमा स्नाकोत्तर तहमा अध्ययन गर्ने पालिकाका सबै बुहारीलाई मासिक २० हजार रुपैंयाँको बुहारी छात्रवृत्ति कार्यक्रम लागु गरिएको छ ।”
यसैगरी उक्त क्याम्पसमै स्नाकोत्तर तहमा अध्ययन गर्ने १० जना छात्रालाई मासिक २० हजारको छात्रवृत्ति प्रदान गरिने भएको छ ।
राजनैतिक प्रतिशोधको आधारमा नभई आर्थिक अवस्था कमजोर भएका परिवारका पढ्नबाट बञ्चित भएका छोरी-बुहारीलाई छात्रवृत्ति प्रदान गरिने प्रवक्ता पौडेलले बताए । छात्रवृत्ति कार्यक्रमले बुहारी तथा छात्राको उन्नती प्रगति हुनुको साथै देश निर्माणमा महिलाले पनि उतिकै योगदान गर्नसक्ने भएकोले पालिकाले छोरी-बुहारी छात्रवृत्ति कार्यक्रम ल्याएको हो ।
छोरी–बुहारी छात्रवृत्तिको प्रभावकारिता बारेमा अध्ययन गरी छनोट भएकालाई अध्ययन अवधिभर पालिकाले रकम प्रदान गरिने प्रवक्ता पौडेलले बताए ।
प्रतिक्रिया