दुईदिने साहित्य महोत्सव सकियो

नुवाकोट – देशभरका चर्चित स्रष्टा तथा साहित्यकारहरू सहभागी भएको दुईदिने “नुवाकोट साहित्य, पर्यटन तथा संस्कृति महोत्सव” सम्पन्न भएको छ ।

साहित्य संगम नुवाकोटको आयोजनामा भएको पुस १४ र १५ गते दुईदिने आयोजित महोत्सवमा नुवाकोट, रसुवा, काठमाडौं, सर्लाही, मोरङ, दोलखा, रामेछाप, अर्घाखाँची, सुर्खेत, जाजरकोट, कैलालीलगायतका तीनदर्जन स्रस्टाहरुको सहभागिता रहेको थियो ।

महोत्सवको पहिलो दिन स्थानीय लाखे नाच, भजनबालन, कविता वाचन र गजल कार्यक्रम रहेको थियो। दोस्रो दिन नुवाकोट र रसुवाका पर्यटकीयस्थलहरुमा स्रष्टा तथा साहित्यकारहरूलाई भ्रमण, कवितावाचन गर्दै बेत्रावतीमा पुगेर समापन भएको थियो ।

साहित्यकारहरुले नुवाकोटको साततले दरबार क्षेत्र, महा चैत्य स्वयम्भू, अशोकबाटिका, शुभघाट, उतरगयाधामलगायतका स्थानहरुको अवलोकन समेत गरेका थिए ।

महोत्सवले स्थानीय भाषा, साहित्य, कला, संस्कृति, पर्यटन विकासलगायतका विषयलाई प्राथमिकतामा राखेको थियो ।

महोत्सवको उद्घाटन बागमती प्रदेशका आर्थिक मामिला तथा योजना मन्त्री बहादुरसिंह लामा र समापन उत्तरगया गाउँपालिकाका अध्यक्ष माधवप्रसाद अर्यालले गरेका थिए ।

महोत्सवको अवसरमा आयोजित रक्तदानमा २१ जनाले रक्तदान गरेका थिए ।