नुवाकोट – रेडियोकर्मीलाई दक्ष बनाउने उद्देश्यले सञ्चार रजिष्ट्रारको कार्यालय बागमती प्रदेशद्वारा आयोजित तालिम आइतबारदेखि नुवाकोटको विदुरमा सुरु भएको छ ।
तालिममा समाचार उत्पादनका लागि आवश्यक प्राविधिक ज्ञान र रेडियोका लागि उत्पादित सामग्रीलाई डिजिटल माध्यमबाट वितरण गर्ने पोडकाष्टको सीप सिकाइने सञ्चार रजिष्ट्रारको कार्यालयका प्रमुख रेवतीप्रसाद सापकोटाले जानकारी दिए।
तालिममा प्रदेशका रसुवा, नुवाकोट, सिन्धुपाल्चोक, काठमाडौ, मकवानपुर र धादिङका २३ जना रेडियोकर्मीको सहभागिता रहेको छ ।
तालिमलाई रत्नराज्य क्याम्पसका पत्रकारिता विभाग प्रमुख डा. श्रीराम पौडेल र सञ्चार रजिष्ट्रार कार्यालयका इञ्जिनियर रोशन कोइरालाले सहजीकरण गर्नेछन् ।
रेडियोलाई बचाउन र टिकाउन खोजिएको उपाय स्वरुप सञ्चालित तालिमबाट सीप सिकेपछि रेडियोकर्मीहरुले गुणस्तरिय रेडियो सामग्री उत्पादन गर्ने जनाएको छ ।
प्रतिक्रिया