नुवाकोट – गाउँपालिकास्तरीय म्हेन्दोमाया तथा साईकोले प्रतियोगिता सम्पन्न भएको छ । म्यागङ गाउँपालिकाद्वारा आयोजित तीन दिनसम्म चलेको उक्त प्रतियोगितामा साइकोलेतर्फ २३ समूह र म्हेन्दोमायातर्फ १८ समूहको सहभागीता रहेको थियो।
म्हेन्दोमायामा म्यागङ-५ को कल्लाबारी म्हेन्दोमाया समूह प्रथम, म्यागङ-३ को चिउरीभञ्ज्याङ म्हेन्दोमाया समूह द्वितीय र म्यागङ-६ को पुरानोपानी म्हेन्दोमाया समूहले तृतीय भएको निर्णायक मण्डलका संयाेजक बिगेन्द्र तामाङले जानकारी दिए ।
यस्तै, साईकोलेमा देउराली सामुदायिक साइकोले प्रथम, सानेगङ मोङ्बोथो साइकोले समूह द्वितीय र बुङताङ सांस्कृतिक साईकोले समूह तृतीय भएका छन् ।
विजेताले क्रमश: रु.५० हजार, २५ हजार र १५ हजार नगद पुरस्कारसहित डम्फु र प्रमाणपत्र प्राप्त गरेको गाउँपालिका अध्यक्ष आशा तामाङले जानकारी दिए ।
विजयी समूहलाई बागमती प्रदेशका आर्थिक मामिला तथा योजना मन्त्री बहादुरसिं लामाले पुरस्कार वितरण गरेका थिए ।
प्रतियोगितामा म्हेन्दोमाया समाजका संथापक विगेन्द्र वाइबा तामाङ, कलाकार तथा निर्देशक राजकिङ वाईबा र संगीतकार शैलाव वाइबाले निर्णायकको भूमिका निर्वाह गरेका थिए ।
प्रतिक्रिया