नुवाकोट – विदुर नगरपालिकाका प्रमुख राजन श्रेष्ठले आफ्नो तलब भत्ताबाट विद्यार्थीलाई पोशाक सहयोग गरेका छन् ।
शुक्रबार नगरप्रमुख श्रेष्ठले आफुले पाउने भत्ता र विद्यालय व्यवस्थापन समितिका अध्यक्ष सुरजमान श्रेष्ठले व्यक्तिगत खर्चमा विदुर नगरपालिका-२ स्थित सामुदायिक विद्यालय भीमसेन माध्यमिक विद्यालयका पूर्व प्राथमिक देखि कक्षा १० सम्मका २८० जना विद्यार्थीलाई विद्यालय पोशाक प्रदान गरेका हुन् ।
नगरप्रमुख श्रेष्ठले आफुलाई राज्यले दिने सेवा सुविधालाई नगरबासीको सहयोगमा खर्चेको बताए । आफुले प्राप्त गरेको सेवा सुविधाको रकम जनताकै करको रकम भएकाले जनतालाई नै आगामी दिनमा पनि सहयोग गर्दै जाने प्रतिबद्धता व्यक्त गरे ।
विदुर नगरपालिका २ नम्बर वडाका अध्यक्ष दिपक कायस्थ र नुवाकोट उद्योग वाणिज्य संघका पूर्वअध्यक्ष शरण उत्सुक सापकोटाको उपस्थितिमा नगरप्रमुख श्रेष्ठ र सुरजमानद्वयले विद्यालयका प्रधानाध्यापक नारायणप्रसाद अधिकारीलाई उक्त सामग्री हस्तान्तरण गरेका हुन् ।
वितरण गरिएको सामग्री नगद तीन लाख बराबरको रहेको समाजसेवी सुरजमान श्रेष्ठले जानकारी दिए । विद्यालयमा अध्ययनरत विद्यार्थीहरूलाई जाडोमा चिसोबाट जोगिन सहयोग पुगोस् भन्ने उद्देश्यले पनि सहयोग स्वरूप उक्त पोशाक सहयोग गरिएको सुरजमानले बताए ।
प्रतिक्रिया