२०७७, ५ आश्विन सोमबार

जापानीज शैलीका तन्काहरु: श्रीराम श्रेष्ठ

डबली खबर     पुष ५ २०७६ २१:२५



shreeram shrestha

|| १ ||
माया जोडियो
खुशी सबै तानियो
नक्कली खुशी
चञ्चले भइदिंदा
पीडाको थुप्रै थुप्रो ।

|| २ ||
नक्कली हाँसो
समस्या आइपर्दा
चिनिन्छ मान्छे
सुखमा साथ दिने
दु:खमा भागी जाने ।

|| ३ ||
पानको पात
चिप्लेकिरा टासिँदा
परेछ प्वाल
खोजेको लाज ढाक्न
निहुरिदै हिँडेको ।

|| ४ ||
झिंगा बनेर
दु:ख दिन खोजेको
ज्यानै धराप
रिसराग उम्रदा
पोखरी नै भासिन्छ ।

|| ५ ||
तित्रा बासेछ
ठूलो ठूलो स्वरमा
लम्के सिकारी
निशाना लगाउँदा
गर्भले छाति चौडा ।

|| ६ ||
हिउँदे झरी
निथ्रुक्क भिजी हिड्दा
खोजी न्यायको
चिसोले जिस्काउँदा
कक्रिदै एकै डल्लो ।

|| ७ ||
सियो बनेर
फाली भइ निस्कदा
असली रुप
लोभलालच गर्दा
ढुसी पर्ने इज्जत ।

|| ८ ||
पञ्चे बाजामा
अघिपछि हिडेको
पक्ष विपक्ष
नसामा डुब्दै जाँदा
इज्जत नै उदाङ्गो ।

|| ९ ||
गोरु जुधाई
मान्छेहरु रमिते
खल्लो संस्कृति
हारजित हुँदामा
बढ्न गयो शत्रुता ।

|| १० ||
भारी भो बर्षा
भिजेको जमिनमा
बीउ उम्रेछ
खुकुलो माटो भित्र
सलबलायो जरा ।

|| ११ ||
बलिको बोको
उफ्रिदै चिच्याउँदा
शत्रु नै काल
बिद्रोह लुकाउँदा
निस्किएको ज्वालाले ।

|| १२ ||
बिहानीतिर
बिउझिएको निन्द्रा
तर्स्यो सपना
टोलाएर बस्दामा
फुट्यो आशूको मूल ।

यो खबर पढेर तपाईलाई कस्तो महसुस भयो ?



प्रतिक्रिया




Top