२०७७, १४ आश्विन बुधबार

नुवाकोटको १ नं.क्षेत्र लोकतन्त्रवादीको आधारभूमी हो: महत

डबली खबर     कार्तिक २४ २०७४ ११:००



नेपाली काँग्रेसको तर्फवाट नुवाकोट क्षेत्र नं.१ को प्रदेशसभा २ मा उमेदवार रहेका काँग्रेस महासमिति सदस्य रमेशकुमार महतले १ नं. क्षेत्र लोकतन्त्रवादीको आधारभूमीको रुपमा रहेको र यसपटकको निर्वाचनमा काँग्रेसको विजयले यसलाई थप स्पष्ट पार्ने धारणा व्यक्त गरेका छन् । “२०४८ वाहेक सबै निर्वाचनमा काँग्रेसको विजयले १ नं.क्षेत्र काँग्रेसको किल्ला हो भन्ने प्रमाणित गरेको छ, अवको विजयपछि यो क्षेत्र लोकतन्त्रको नाराले सधैं गुञ्जायमान भईरहनेछ”–महतको थप भनाई थियो ।

मंगलवार सूर्यगढी गाउँपालिका ५ को हल्देकालिकामा कार्यकर्ता भेटघाटका क्रममा प्रदेशसभा उमेदवार महतले अहिलेको निर्वाचन कुनै पार्टी बिशेष भन्दा पनि लोकतन्त्र र साम्यवादवीचको जनमत परीक्षण समेत भएकाले विगतमा छरिएर रहेका सम्पूर्ण लोकतन्त्रवादीहरु एकै ठाउँमा उभिनुपर्नेमा जोडदिए । नुवाकोटको समग्र विकासमा काँग्रेसको नेतृत्वदायी भूमिकाका कारण छोटो समयमा उल्लेख्य प्रगती भएको वताउँदे काँग्रेस नेता महतले जनताको अभिमत सदैव विकास र समृद्धिको पक्षमा रहने भएकाले नुवाकोटका सबै क्षेत्रमा काँग्रेसको नेतृत्व स्थापित हुने दावी समेत गरे ।

कार्यक्रममा काँग्रेस क्षेत्रीय सचिव रामजी पौडेल, काँग्रेस नेता होम्सराज गिरी, रामशरण राई, रामकुमार गिरी लगायतले नुवाकोटको विकासको सारथी काँग्रेस मात्र भएकाले काँग्रेसको पक्षमा जनलहर सिर्जना भएको वताए ।

यो खबर पढेर तपाईलाई कस्तो महसुस भयो ?



प्रतिक्रिया




Top