२०७७, ५ आश्विन सोमबार

लाखेनाच प्रतियोगितामा त्रिशूली लाखे समूह पहिलो

डबली खबर     भाद्र २ २०७४ ०८:०८



बटार/ नेवार समुदायको परम्परागत लाखेनाचको संरक्षण र प्रचारका लागि भन्दै नुवाकोटको बट्टार बजारमा आयोजित संगम लाखेनाच प्रतियोगितामा त्रिशूली लाखे समूह पहिलो भएको छ ।

संगम बचत तथा ऋण सहकारी संस्थाले १३औँ वार्षिकोत्सवका अवसरमा शनिबार सञ्चालन गरेको प्रतियोगितामा पीपलटार लाखे समूह कोलोनी दोस्रो तथा गँगटे लाखे समूह तेस्रो भएका थिए । प्रतियोगितामा बट्टार लाखे समूह र विदुर लाखे समूहले सान्त्वना पुरस्कार हात पारेका छन् । प्रतियोगितामा बगुवा लाखे समूहले उत्कृष्ट मुखुण्डोको पुरस्कार पाएको थियो ।

प्रतियोगितामा पहिलो हुनेलाई रु. २० हजार, दोस्रो हुनेलाई रु. १० हजार, तेस्रो हुनेलाई रु. पाँच हजार र सान्त्वना हुनेलाई रु. दुई हजार नगदसहित पुरस्कार प्रदान गरिएको थियो । प्रतियोगितामा नौ समूहले सहभागिता जनाएका थिए ।

विजयीलाई विदुर नगरपालिकाका मेयर सञ्जु पण्डितले पुरस्कार वितरण गर्दै नेवार समुदायको लाखेनाच सबै नेपालीको पहिचान जनाउने संस्कृति भएकाले यसको संरक्षणमा सबै पक्ष लाग्नुपर्ने बताए ।

प्रतियोगिताका संयोजक दिनेश श्रेष्ठले जिल्लामा नेवार समुदायको बस्ती बाक्लो भए पनि लाखेनाचको प्रचलन सदरमुकाम र वरपर मात्र सीमित हुन थालेकाले नाचको महत्व दर्शाउनका लागि पनि प्रतियोगिता सञ्चालन गरी प्रचारप्रसार र संरक्षणमा सहयोग गरिएको बताए ।

नेवार संस्कृतिविद् नरेन्द्र प्रधानले जिल्लामा लाखे समूह २० भन्दा धेरै भए पनि अहिले प्रतियोगितामा थोरै मात्र सहभागी भएको बताउँदै लाखेनाच सञ्चालन गर्न खर्चिलो भएकाले नाच प्रदर्शन कम हँुदै गएको बताए । ‘सरकारी तवरबाट लाखेनाच संरक्षणको कुनै कार्य नभएपछि एउटा संस्थाले यसलाई प्राथमिकता दिनु राम्रो हो,’ उनले भने, ‘संस्कृति संरक्षणमा सबै सङ्घसंस्था र व्यक्ति सक्रिय हुनुपर्छ ।’

जिल्लामा बट्टार, बेत्रावती, देवीघाट, त्रिशूली, दुईपीपल, नुवाकोट, खरानीटार, रालुका, तारुकालगायत स्थानमा गाईजात्राका अवसरमा लाखेनाच प्रदर्शन गरिन्छ । पछिल्लो समय भने नाच लोपोन्मुख अवस्थामा रहेको छ ।

यो खबर पढेर तपाईलाई कस्तो महसुस भयो ?



प्रतिक्रिया




Top