नुवाकोट – पेशाको तुलनामा पछिल्लो समय शिक्षण पेशाप्रति युवा पिढीको आकर्षण घट्दो देखिन्छ । साथै सरकारी सेवाका कर्मचारीको सामान्यतया दुई/पाँच वर्षमा सरुवा हुने गरेको पाइन्छ । तर, ककनी गाउँपालिकास्थित एक विद्यालयका शिक्षक एउटै विद्यालयमा निरन्तर करिब चारदशक अध्यापन गरि आइतबार सेवाबाट बिदा भएका छन् ।
तारकेश्वर गाउँपालिका-३, तिनपिप्ले काठमाडौंमा जन्मिएर वि.सं. २०४१ देखि ओखरपौवा माध्यमिक विद्यालय ककनी गाउँपालिका-१ मा शिक्षण पेशामा आबद्ध भएका प्राथमिक तह, द्वितीय श्रेणीका शिक्षक दुर्गाप्रसाद जम्कटेललाई विद्यालयले एक कार्यक्रमबीच दिर्घसेवा सम्मानसहित बिदाइ गरेको विद्यालयका प्रधानाध्यापक ठाकुरप्रसाद फ्युयालले जानकारी दिए ।
गाउँमा प्रवेशिका परीक्षा (एसएलसी) पास गर्ने व्यक्ति खोज्नुपर्ने तत्कालीन समयमा २०४१ चैत्र १९ देखि अध्यापन शुरु गरेका उनी ६ वर्षसम्म अस्थायी शिक्षक रहेपनि २०४८ जेठ १ देखि स्थायी भएका थिए । ३८ वर्ष ९ महिना १३ दिनसम्म एउटै थलोमा काम गर्दै आएका उनले माघ १ गतेबाट स्वेच्छिक अवकाश रोजेसँगै अनिवार्य अवकाशको अठार महिना अगावै विद्यालयले दोसल्ला ओढाएर दीर्घसेवा सम्मान तथा कदरपत्रसहित अभिनन्दन र अबिर, खादा र माला पहिराएर बिदाइ गरेको हो ।
शिक्षण अवधिमा जम्कटेलले एकै परिवारका हजुरबा, छोरा–छोरी र नाति–नातिनीसमेत गरि तीन पुस्तालाई समेत पढाएका छन् । जागिरे जीवनमा उनका धेरै विद्यार्थी आफ्नै सहकर्मी पनि बने । अझ संयोग नै मान्नुपर्छ, उनी बिदाइ भइरहँदा विद्यालयका प्रधानाध्यापक, सहायक प्रधानाध्यापक, शिक्षक–अभिभावक संघका अध्यक्ष र व्यवस्थापन समितिका अध्यक्ष चारै जना उनैले पढाएका विद्यार्थी रहेका छन् ।
शिक्षण धन र लाभभन्दा पनि खुशी र आत्मसन्तुष्टि मिल्ने सेवामूलक पेशा रहेको उनको अनुभव छ । बजारमा किनमेल गर्न जाँदादेखि सरकारी कार्यालयमा काम लिन जाँदा समेत विद्यार्थीबाट नमस्कार र सम्मानसहित सेवा पाएका मीठा ‘माष्टरी अनुभव’का सँगालो उनीसँग छ ।
कार्यक्रममा शिक्षक–अभिभावक संघका अध्यक्ष उद्धव फ्युयालले जम्लटेलसँगको विद्यार्थी जीवनस्मरण गर्दै उनको सुखद् निवृत्त जीवनको कामना गरे ।
विद्यालय व्यवस्थापन समितिका अध्यक्ष दिवाकर घिमिरेले आफू पनि उनी लगायतका गुरुहरूको शिक्षा र मार्गनिर्देशनले सो स्थानमा पुगेको बताउँदै गाउँको शैक्षिक मुहार फेर्न जमकटेलको महत्त्वपूर्ण योगदान रहेको बताए ।
विद्यालयका प्रधानाध्यापक फ्युयालले जमकटेल एउटा शिक्षक मात्र नभई सामाजिक परिवर्तनमा समेत उनको योगदान रहेको बताए ।
प्रतिक्रिया