चालक अनुमतिपत्र विना विद्यार्थी सरर इन्जिन गाडीमा

नुवाकोट – सदरमुकाम विदुरसहित आसपासका क्षेत्रहरु बट्टार, त्रिशुली, कोलेनी, देविघाटलगायतका विद्यालय वा क्याम्पसमा पढ्ने विद्यार्थीहरु मोटरसाइकल चढेरै अध्ययन गर्न पुग्न गरेका छन् । उमेरको हकमा १४ देखि १७ वर्षसम्मका हुने विद्यार्थीहरु कक्षा ९ देखि १२ सम्म अध्ययन गर्ने हुन्छन् ।

यता विद्यालयले कक्षा ९ र १० पढ्ने विद्यार्थीलाई बिहानीसत्रमा थप अध्ययनको लागि कोचिङका कक्षा सञ्चालन गरेको पाइन्छ । एसइईको नतिजा उत्कृष्ट निकाल्न र विद्यालय सफल पार्नको साथै विद्यार्थीलाई सबल बनाउन यी कक्षाहरु सञ्चालन गरेको बताउँछन् । बिहान सात बजेदेखि ९ बजेसम्म कक्षा सञ्चालन हुन्छ । त्यसपछि खाना खानको लागि विद्यार्थीको दौडधुप सुरु हुन्छ । कसैका अभिभावकले खाना विद्यालयमै पुर्याउने गर्दछ । कोहि विद्यार्थी पैदल वा सार्वजनिक यातायातमै सवार हुन्छन् र घर पुग्छन्, खाना खान्छन् र विद्यालय फर्कन्छन् । त्यस्तै, मोटरसाइकल चलाउने सीप भएकाहरु त्यसमै यात्रा गर्छन्, घर पुग्छन, खाना खान्छन र विद्यालय फर्कन्छन् ।

यस्तै, भर्खरै क्याम्पस पढ्न जाने विद्यार्थीहरुको लर्कोमा पनि त्यस्तै समस्या छ । अझ पछाडी एक जनालाई समेत लिएर आउने जाने गरेको छ । जथाभाबी बाइक हुइँक्याउँदा दुर्घटना बढ्नुका साथै विद्यार्थी जीवनसमय त्यतिकै व्यतित हुदैंछ ।

सहजता र सीप हेरेर अभिभावकले आफ्ना सन्तानलाई मोटरसाइकल वा स्कुटर चलाउन दिन्छन् । विद्यालयले विद्यार्थीको नियमितता मात्र हेर्छन् । तर मोटरसाइकल चालकको अनुमति १६ वर्ष उमेर पुगेपछि पाइने कानुनी व्यवस्था हेर्दैनन् र नुवाकोटका ट्राफिक प्रहरी र नियमन निकाय पनि मुख दर्शक छन् । स्थानीय निकाय, ट्राफिक प्रहरी र विद्यालय व्यवस्थापनले अनुगमन गर्न नसक्दा विद्यार्थी, अभिभावक र विद्यालयले आफै स्व:आचारसंहिताको पालना गर्नुपर्ने देखिन्छ ।

मोटरसाइकल चलाउने सीप हुदाँ पनि कानुनले वञ्चित गरेकोमा आफ्नो परिचय नखुलाउने शर्तमा एक विद्यार्थी गुनासो गर्छन् । उनी थप्छन, “अध्ययनको लागि बिहानै विद्यालय पुग्नैपर्छ र खानाको लागि घर आउनैपर्छ। विद्यालयमै खानाको व्यवस्था गरिदिएको भए कति सजिलो हुने थियो । कतिपय भने बिहानको खाना हल्काफुल्का खानामै चित्त बुझाउने गर्छन् ।”

सवारीसाधन चालक अनुमतिपत्र मोटरसाइकल चलाउने विद्यार्थी र उनका अभिभावकलाई सँगै राखेर प्रशिक्षण दिने कार्यक्रम जिल्ला ट्राफिक प्रहरी कार्यालयले गर्नुपर्ने देखिन्छ । विद्यालयमा अध्यनरत गर्ने विद्यार्थीलाई अनुशासन बस्न सिकाएनन् भने भविष्यमा कस्तो अपेक्षा राख्न सकिन्छ । विद्यालय, अभिभावक, ट्राफिक प्रहरीको यस्तो लापरबाहीको लागि राज्यको सक्रियता आवश्यक छ। बिना चालक अनुमतिपत्र मोटरसाइकलमा विद्यालय/क्याम्पस जाने भविष्यका कर्णधार मानिने युवा विद्यार्थीहरुलाई सडक दुर्घटनाबाट बचाउन अभियान यस किसिमको लापरवाही रोक्नु ट्राफिक प्रहरी अग्रसर हुनु आवश्यक छ ।

शैक्षिक संस्थाका बस चेकजाँचमा कडाई