नुवाकोटका मतदाताले वाम गठवन्धनलाई सदैव साथ दिन्छन् : नारायणप्रसाद खतिवडा

नेकपा (एमाले) नुवाकोटका अध्यक्ष नारायणप्रसाद खतिवडा जिल्लामा लोकप्रिय इमान्दार र स्वच्छ छवि भएका नेतामा पर्छन ।  उनीसंग चार दशक अगाडिदेखिको राजनीतिक अनुभव छ । ६० वर्षिय खतिवडालाई नुवाकोटका सबै स्थान र समुदायका सम्वन्धमा जानकारी छ । तारकेश्वर गाउंपालिका वडा नं. २ तारुका घर भएका खतिवडा जनतालाई प्रत्यक्ष सेवा गर्न शिक्षण पेशा छाडेर पार्टी भुमिगत भएकै बेलादेखि राजनीतिमा होमिए । नेकपा  एमाले नुवाकोटका संस्थापकसमेत रहेका खतिवडासंग पार्टीको जिल्ला सदस्य, सचिवालय सदस्य हुदै दुई पटकसम्म निर्वाचित जिल्ला अध्यक्ष भई कार्य गरिसकेको अनुभव छ ।  सबैका ‘नारायण दाइ’को उपमाले प्रख्यात खतिवडासंग २०५४ सालदेखि तीन वर्षसम्म तत्कालीन जिल्ला विकास समितिको उपसभापति र दुई वर्ष सभापति भई जनताको कार्य सम्पादन गरेको अनुभव छ । सदरमुकाम विदुर समेटिएको क्षेत्र नं. २ मा कांग्रेस नेता अर्जुननरसिह केसीसंग वाम गठवन्धनका उम्मेदवार एमाले नुवाकोटका अध्यक्ष तथा जिविस नुवाकोटका पुर्व सभापति नारायणप्रसाद खतिवडा चुनावी मैदानमा भिडेका छन् । खतिवडा २०७० सालको दोश्रो संविधान सभा निर्वाचनमा नुवाकोट क्षेत्र नं. ३ मा निकटतम प्रतिद्वन्दी थिए । प्रस्तुत छ, त्यागी नेता खतिवडासंग  गरिएको सारसंक्षेप । 

मतदाताको प्रतिक्रिया कस्तो पाउनुभयो ?

म एक सातादेखि चुनावी प्रचारप्रसार अभियानमा सक्रिय भएर लागेको छु । नुवाकोटको पश्चिमी भेगमा रहेको मेघाङ गाउंपालिकामा चुनावी कार्यक्रम सकें । किस्पाङमा गरिरहेको छु । दुवै गाउंपालिका सचेत तामाङ समुदायका मतदाताको बाहुल्यता रहेको स्थान हो । अब नगर तथा अन्य गाउं केन्द्रीत कार्यक्रममा सकिय भएर लाग्छु । म हरेक गाउंमा पुग्दा मेरो विगतलाई साक्षी राखेर मेरो विजयका लागि मतदाताको शुभेच्छा, शुभकामना मैले प्राप्त गरेको छु । मलाई तपाईहरु लाग्नुस् यसलाई सकारात्मक रुपमा अघि बढाउनुहोस् हामी तपाइका साथमा छौं भन्ने शुभेच्छा अधिकांशले राखेका छन् ।

मंसिर १० गते पहिलो चरणमा नुवाकोटमा प्रतिनिधिसभा र प्रतिनिधिसभाको निर्वाचन एकैदिन हुने भएको छ । प्रत्यक्ष र समानुपातिकको फरक फरक मतपत्र हुने र हामी गठबन्धन बनाएर अघि बढिरहँदा निर्वाचनमा मतदान गर्ने कुरामा मतदातामा केही ‘कन्फ्यूजहरु’ छन् । छिटो मतदाता शिक्षा कार्यक्रम लागू गर्न निर्वाचन आयोगलाई अनुरोध गर्दछु । कसरी मतदान गर्ने के गर्ने, हाम्रो मत बदर त हुँदैन भन्ने कन्फ्युज छन् । यसलाई चुनावको क्रममा हटाएर लैजाने छौँ ।

अर्को कुरा विकास निर्माणमा यो तालमेलले थप टेवा पु¥याओस् र पहिलेजस्तो जितेर जाने र जनताको काम नगर्ने, मन्त्री बन्ने अनि नफर्कने कुरामा स्थिति नबनोस् र यी कुराहरुलाई चिर्न वाम गठबन्धन सचेत भएर अघि बढोस् भन्ने चाहना रहेको छ ।

वाम गठवन्धनको चुनावी अभियान कसरी अघि बढिरहेको छ ?

नेकपा एमाले र नेकपा माओवादी केन्द्रको तर्फबाट संयुक्त उम्मेदवारी दिएका छाँै । यसको पहिलो चरणको कार्यक्रम अन्र्तगत प्रतिनिधिसभा क्षेत्र नं. २ स्तरीय कार्यक्रम पनि यो क्षेत्रका विभिन्न स्थानमा गरिसकेका छौँ । प्रदेश सभातर्फ उम्मेदवारी दिनुभएका नेताहरु पनि वाम गठबन्धनलाई बलियो वनाउंदै हिड्नुभएको छ । अहिले हामी घरदैलो, गाउँपालिकास्तरीय भेला, प्रशिक्षण, भेटघाटजस्ता कार्यक्रम सञ्चालन गरिरहेका छौँ ।  विस्तारै विस्तारै चुनावी आमसभामा केन्द्रीत हु्ँदै दुई ठुला पार्टीवीचको गठबन्धन भएकाले संयुक्त भेला निर्वाचन परिचालक कमिटि गठन लगायतका कार्यक्रम गरिरहेका छौँ ।

तालमेल गरेर चुनावमा उत्रिँदा कार्यकर्ताको मनोभावना कस्तो पाउनुभयो ?

कार्यकर्तामाझ वाम एकताप्रति अत्यन्त उत्साह रहेको छ । यो उत्साह मतदाता तहसम्म पुगेको छ । कार्यकर्ता तहमा कसरी व्यवस्थापन हुन्छ भन्ने अन्योलमा कता कता भएको हुन सक्छ । त्यो पनि शिर्ष नेताहरुले टुंग्याउने कुरा भयो । मेरो विगतमा जिविस तथा पार्टीमै रहेर गरेको कामको कदर यस पटक पक्कै हुन्छ भन्ने विश्वासमा रहेको छु ।

तपाइसंग प्रतिस्पार्धमा लोकतान्त्रिक गठवन्धनका अर्जुननरसिह केसी छन् नि ?

हेर्नुस, अर्जुननरसिह केसी नुवाकोटमा कम्युनिष्ट एक नभएको वेलामा पटक÷पटक चुनाव जितेर मन्त्रिसमेत हुनु भयो । उहांले नुवाकोट र नुवाकोटे मतदाताको हितमा के गर्नुभयो ? त्यो त तपाइ हामी सबैलाई घाम जस्तै उज्यालो छ । अहिले कम्युनिष्टहरु एक भएका छौं । परिवर्तन, स्वाभिमान र एकताको पक्षमा रहेका नुवाकोटका मतदाताले अब वाम गठवन्धनलाई सदैव साथ दिन्छन् ।

वाम उत्साह हुनुपर्ने के कारण छ ?

नेपाली मतदाताको कम्युनिष्टहरु एकै ठाउँमा उभिदिए हुन्थ्यो भन्ने लामो समयदेखिको चाहना हो । तर, विविध कारणले यो कुराले निरन्तरता पाउन सकेको थिएन । अहिले दुई प्रमुख घटकहरु एक ठाउँमा उभिएका छन् । त्यसैले नागरिकहरु सबैभन्दा खुशी छन् ।  दोस्रो कुरा नेपालमा परिवर्तनको नेतृत्व गर्ने पार्टी नै कम्युनिष्ट पार्टी हुन् । यो कुरा आम मतदातालाई थाहा छ । बाहिरी प्रचारमा जे भएपनि फिल्डमा खट्ने, लाग्ने पार्टी कम्युनिष्ट पार्टी हो । यो पार्टीले नै परिवर्तनको नेतृत्व गर्न सक्छ भन्ने कुरा आम नागरिकलाई राम्रोसँग थाहा छ ।

तेस्रो कुरा प्रगतिशील फड्को मार्ने देशमा विकास निर्माण र सामाजिक सुरक्षासम्मको कुरामा अग्रगामी कुरामा कम्युनिष्ट पार्टीले मात्र अग्रगामी दृष्ट्रिकोण अगाडि सारेको छ । यसले मात्र यसको नेतत्व गर्न सक्छ भन्ने कुरा थाहा छ । चौथो कुरा हामी ६÷६ महिनामा सरकार परिवर्तन गर्ने प्रवृत्ति रहेको छ । त्यसमा पनि बाह्य हस्तक्षेप रहने कुरा छ । नेपाली जनता त्यसको अन्त्य गर्न चाहन्छन् । दीगो सरकार गठन गर्नेए र बाह्य हस्तक्षेप विरुद्ध यो एकता र गठबन्धनले अन्त्य गर्नेछ ।  पाँचौ कुरा राष्ट्रियताको सवालमा डटेर कुरा गर्ने वकालत गर्ने, राष्ट्रिय मुद्दामा एकजुट भएर अघि बढ्ने पार्टी नै कम्युनिष्ट हुन् ।

त्यसैले यिनीहरु मिल्दा राष्ट्रिय स्वाधिनता, अखण्डतामा सार्वभौमिकताको रक्षा हुन सक्छ भन्ने नागरिकले प्रत्यक्ष महसूस गरेका छन् । त्यसकारण नागरिकहरु यो गठबन्धनको पक्षमा छन् ।

वाम तालमेलप्रति कतिपय कार्यकर्ता र मतदाताहरु संसय व्यक्त गरिरहेका छन् नी ?

केही भ्रम हुनु स्वभाविकै थियो । एकताका निम्ति, चुनाव आइसकेको थियो , त्यस्तो अवस्थामा हामीसँग दुई वटा बाटो थिए । एउटा तत्काल एकता घोषणा गर्ने अनि निर्वाचनमा जाने । अर्को निर्वाचनमा सँगै जाने । निर्वाचन नजिकै आइसकेकोले तुरुन्त एकताको घोषणा गरेर जाँदा धेरै कुराहरु मिलाउन गाह्रो हुन्थ्यो, त्यसैले त्यो त्यति सम्भावना थिएन । त्यसैले यी दुई वटा पार्टीहरुमा चुनावी तालमेल गर्ने र यो तालमेलाई चुनाव पछि पार्टी एकीकरणमा लगेर टुंग्याउने सहमति भएको छ ।

यस बीचमा के प्रयाससम्म भयो भने हामी एउटै चुनाव चिन्ह लिएर निर्वाचनमा उभिने कुरा पनि भयो । तर, यो कानुनी रुपमा त्यति सहज भएन र फरक फरक चिन्ह लिएर चुनावी मैदानमा उत्रिएका छौँ । यसको मुल उद्देश्य भनेको पार्टी एक बनाउने नै हो । यसमा कुनै संसय छैन । पार्टी पंक्तिमा जुन उत्साह देखिएको छ यसले पार्टी एकता हुन्छ भन्ने कुरामा ढुक्क नै छ ।

एजेण्डगत हिसावमा त एमाले र माओवादी फरक फरक बाटोमा हिँडिरहेका छन् यसको समायोजन कसरी हुन्छ ?

हो, मुल कुरा विचार र सिद्धान्तको कुरा हो । नेकपा एमालेले आत्मसात  गरेको बहुदलीय जनवाद हो । यसलाई हामीले हाम्रो पार्टीको मार्गदर्शन सिद्धान्त भनेका छौँ । र माओवादी केन्द्रले अंगिकार गरेको एक्काइसाँै सताब्दीको जनवाद हो । यसका बीचमा खासै भिन्नता छैन । हामीले हिजो अस्तीमै भनेका थियौँ, जवजकै अर्को रुप हो । तर, यसमा व्यवहारिक रुपमा सांगठानिक रुपमा केही फरक छन् ।

प्रसंग बदलौँ, नुवाकोटमा प्रतिनिधिसभातर्फ उम्मेदवारी दिनुभएको छ, तपाईका एजेण्डाहरु के के छन् ?

अहिलेको मुख्य एजेण्डा भनेको संविधान र संघीयताको कार्यान्वयन नै हो । घोषणा भएको संविधानको व्यवहारिक कार्यान्वयन गर्नको लागि निर्वाचन जरुरी थियो । निर्वाचन पछि पनि यसलाई उचित रुपमा कार्यान्वयन गर्नको लागि कम्युनिष्टकै सरकार आवश्यक छ । संविधान बनाउन जसले ठूलो योगदान दियो, उसैले मात्र संविधानको रक्षा गर्न सक्छ ।